انصار(جمعه، د تله ۷ مه)، د طالبانو د بهرنیو چارو وزیر مولوي امیرخان متقي، چې د مسکو فارمټ د پنځمې غونډې لپاره تاتارستان جمهوریت ته رسیدلی، د غونډې په څنډه کې د افغانستان د روان وضعیت او په اړه یې په دغه غونډه کې د کیدونکو غوښتنو په تړاو وار د مخه رسنیو ته خپل دریځ په ډاګه کړی.
ښاغلی متقي ویلي، چې د دوی رژیم په افغانستان کې د امنیت په تامینولو، د نشه یي توکیو په له منځه وړلو او د سیمې او نړۍ هېوادونو ته د افغانستان له خاورې د خطرونو په ختمولو توانیدلی.
هغه له طالب رژیم څخه د سیمې او نړۍ د هېوادونو د نورو غوښتنو په اړه ویلي، چې پاتې نور مسایل د افغانستان داخلي موضوعات دي.
نوموړي له زیاتو جزیاتو پرته دا هم ویلي، چې دوی د دیپلوماسۍ په برخه کې بریالي روان دي.
د طالبانو د بهرنیو چارو وزیر دا څرګندونې په داسې مهال کړي، چې تمه کیږي د مسکو فارمټ په نننۍ غونډه کې د سیمې د بېلابېلو هېوادونو دیپلوماتان له نوموړي یو شمېر غوښتنې مطرح کړي.
پرون د افغانستان لپاره د روسیې ځانګړي استازي ضمیر کابلوف وویل، چې دوی د طالبانو رژیم د ټول شموله حکومت د جوړولو او د ټولو اقلیتونو او ښځو د حقونو د تامین په شرط په رسمیت پېژني.
طالب چارواکو بیا په دې اړه څرګندونې رد کړي او ویلي، چې رژیم یې ټول شموله او د ټولو د حقونو تامینونکی دی.
روسي چارواکو ویلي، چې طالب وزیر او ورسره ملګری پلاوی یې د غونډې د ګډونوالو نه؛ بلکې مېلمنو په توګه بللي دي.
په دې غونډه کې د مسکو فارمټ د لومړنیو څو غونډو برعکس، امریکایي دیپلوماتان نه دي بلل شوي او د سیمې د هېوادونو له اړخه هم د افغانستان لپاره د دوی استازي ګډون پکې لري.
URL تعقيب: https://www.ansarpress.com/pashto/27332
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني